Ralkap thuneihnak dokalh ih dothlennak tuah ruangah thihnak tongtu pawl thuhla cu NUG ih Ministry Of Defense in cazin a la rero.
Dothlennak ah raltha zetin doawknak ih thihnak tongtu thuhla pawl cazin an tuah thu le an ralthatnak cu kumkhua in upatnak pek ding a si thu NUG ih Ministry Of Defense cun thuthannak an nei.
Thihnak tongtu pawlih thuhla tuah tikah from tuahtu ih hmin, phone nambat, form tuahtu pehtlaih theihnak signal (or) Telegram nambat, thihnak tongtu ih zuk, hmin, pai hmin, kum, battallion, thihnak hmun, zuk(passport size), tansanmi sungkua minung zat, tansami sungkua pehtlaih theihnak ding an umnak, phone nambat, signal (or) Telegram pawl telh ding a si.
Ralkap in rampi thuneihnak a laknak thla 8 a kim zo ih, cumi sungah ralkap in meithal hmannak ruangah thihnak le hriam tongtu pawl, kaih tahratih thawngthlakmi an um hleiah rampi huap in tualsung hriamkai le ralkap cu doawknak khal a nasa sinsin.
AAPP cun ralkap ih meithal kahnak ruangah tualsungmi mipum 1160 lenglo an thi ih, mipum 8800 lenglo kaih an tong tiah an sim.
NUG cun ralkap pawl do kirsalnak a thok thu le Min Aung Hlaing ih hruaimi ralkap uknak cu a hram phoh ko do kirsal dingah September 7 ah thuthannak an rak nei.
