NUG cozah in Myanmar ramsung hmunram ṭhenkhat lak ngahmi a um zo ruangah mipi ukawknak lam dinsuah thei dingin NUG cun Co-u pe ih an ṭuan ding thu NUG ih Defense Minister ဦးရည်မွန် cun a sim. Mizansun February 10 ih tuahmi KIA in ziangti vekin an humhual ramsung an ukih an kaihruai timi hlawmawknak le relkhawmnak meeting cu NUG ih Defense Minister ဦးရည်မွန် khal kai ve in cui’ an meeting ih a simmi a si. Hi tawnkhawm lairelnak ah NUG ih Ministry of Home Affairs and Immigration tlangbawi ဦးလွင်ကိုလတ် khalin a telpi ve.
Hi an meeting nak ah Tlangbawi ဦးလွင်ကိုလတ် cu Thing inn hnuai pakhat ihsin meeting a kai lai Zuk thawn tarlangmi khal hmuh theih in a um. Defense Minister U Yin Mon cun ukawknak lam, thuṭhennak lam, siah khawnnak lam tipawl checkfel nak le hnaṭuan dan bangran aw dingin an kaihhruai tum thu a sim tel.
Ministry of Home Affairs and Immigration tlangbawi ဦးလွင်ကိုလတ် khalin lailak mipi ukawknak lam sersuahnak Central committee ih hnaṭuanmi pawl tawi famkim ten simthannak khal a nei tiah theih a si. Cun KIA lam khalin mipi ukawknak lam thawn pehpar ih an tawntehmi pawl hlawmnak an nei ih, siah khawn thu thawn pehparmi, thuṭhennak lam thawn pehpar mi le mipi huaihawtnak lam ih an tawntehmi pawl hlawmnak le fawrhfialnak an nei ve tiah NUG cun thuthannak an nei.
Tuizan hi Chin Net cun Lairawn Kalay peng ihsin MP rak ṭuantu le CRPH member asimi MP Pi Siami Live Talk neihpi ding kan si, in rak thlir cio dingah kan lo sawm. Tuiṭum zinglam hrang kan thuthang cu hi hmuah a si. Zanlam ah thuthang thar dang thawn kan tawngaw lehsal ding. Chin Net thuthang rak ngaitu nan zate parah kan lungawi.