KNU hmunram sungah November 1 – 11 tiang doawknak ah ralkap lam ihsin Captain pakhat telin ralkap 85 an thi tiah KNU central cun thuthannak an nei.
KNU hnuaiih um KNLA le KNDO cu ralkap pawl thawn ni 11 sung an doawknak thuhla cu November 15 zaanlam ah thuthannak an nei.
KNU hmunram Tațhung distric brigade (1), Taungngu distric brigade (2) le Mutraw distric brigade (5) ram sungah November 1 – 11 tiang doawknak țum 90 a um ih ralkap lam ihsin captain pakhat, second lieutenant pakhat, corporal 2 telin ralkap 85 an thi ih mi 61 hriamhma an ngah tiah thuthannak ahcun an tarlang.
Hi doawknak ah ralkap le an tefa BGF pawl cun tualsung mipi umnak khua sungah hriamhreipi an kah. Cuihleiah ralkap lam ih doawknak cangvaihnak cu KNLA lam in kap lo dingah le in kap asile khua sungah hriamhreipi kan kap ding tiah khua upa pawl ko khawm in an hringhro tiah KNLA cun an sim.
Duailu (ဒွယ်လိုး) peng sung ထီသွီးအူ khua phungki tlawng ah hmunkhuartu Ba-ann khawpi ih ralkap khamahyah 409 le BGF battallion 1014, Thanlwin lilawn hnuaiih hmunkhuartu Navy ralkap Long le Belin peng sung ih pukpi ralkap, ralkap khamahyah 406, BGF battallion 1014 ih Bo Tin Win hohami pawl cun doawknak ni pawl ah kiangkap khua pawl cu hriamhreipi an kap, lamzin sukso pawl phone an check, khua sung ih pawl khal a siat thluh tiah KNU cun thuthannak ahcun an tarlang.
