National League For Democracy (NLD) Central Excutive Committee sungtel U Ngian Win (kum 79) cu Covid – 19 in tuini July 20 zing ah Yangon siizungpi ah a thi thu theih a si.
U Ngian Win cu SAC in pukmah 505 thawn thubuai an tuah ih Yangon khawpi Insein thawnginn ih a ret laifang July 11 ah Covid – 19 positive a si thu an thei suak ih Yangon siizungpi ah țhawn tahratin an tuamhlawm.
U Ngian Win cu NLD ih daan lam thuron petu a siih, party ih ramleng tlangbawi hlun khal a si.
Mon ramkulh Paung peng vote hmunram 1-nak ihsin 1990 rampi hrilawknak ah pyituh hluttaw palai a rak zuam ih nehnak a rak co.
2021 February 1 ih ralkap in rampi thuneihnak a laksal tikah rampi hruaitu pawl le NLD upa pawl cu ralkap in an rak kai.
U Ngian Win cun a innsangnu le fanu pakhat, tu pahnih a tansan. A ruak cu tuini ah vui cih dingin an tawlrel.
