Karenni ramkulh ဒီမော့ဆို doawknak khal a sosang nasa lai. Manisun an doawknak ah Kawl ralkap lam siseh Karenni PDF lam siseh mithi le hriamtuar an um veve thu theih a si.
Manisun, May 31, sun hnu nazi 2 hrawng ihsin mizan zanlai nazi 10 tiang rori Karenni PDF le Kawl ralkap pawl nasa zetin an doaw. Kawl ralkap lam hi mithi le hriamhma tuar an tam nasa, Karenni PDF lam khal mithi le hriamhma tuar an um ve thu Free Burma Ranger-Karenni cun thusuah an tuah.
Manisun an doawknak ah Kawl ralkap pawl လွိုင်ကော် ih ṭanhmun khuar pawl cun လွယ်တာမူ Tlang ihsin hriamhreipi pawl in ဒီမော့ဆို khawsung ah an rak kap ciamco. Raldonak Helicopter MI35P pawl khal hmangin nasa zetin an do. Kawl ralkap lam hi mithi le hriamhma tuar an tam zet i, ziangzat cekci timi theih a si lo, Karenni PDF lam ihsin miralṭha pakhat in ram le miphun hrang nunnak a liam, hriamhma tuar an tam, tiin an sim.
Manisun Karenni ramkulh ဒီမော့ဆို ih Karenni PDF le Kawl ralkap doawknak ah hin Kawl ralkap lam mi 80 hnakih tam an thih thu KNDF cun thusuah an tuah. An tarlang dang cu hitin a si.
May 31, simlam nazi 1 hrawngah ဒီမော့ဆို peng ကုန်သာ khaw lam ah Kawl ralkap pawl cu Lwekaw ihsin an rat ruangah KNDF thawn hmatawn ah doawknak a suak. Kawl ralkap lam cun KNDF pawl cu kut ih tuahmi Meithal lawng an nei tiih ruat in ralkap minung 150 hrawng an ra pawk tiah mithmu tu cun an sim. Asinan Kawl ralkap pawlih an rak ruahdan vek siloin KNDF lam cun ralkap minung tam zet an rak khawmaw ih hriamhrei ṭhaṭha an rak khawlmi pawl thawn ṭha zetin an rak do ve.
ဒီမော့ဆို peng ကုန်သာ doawknak ah hin Kawl ralkap lam mi 80 hnakih tam an thih thu KNDF miralṭha rualpawl lakih mithmutu pawl cun an sim, cun KNDF pawlin Kawl ralkap pawlih ralthuam hriamhrei khal tam zet an lawng. KNDF miralṭha rualpawl in Kawl ralkap pawl cuvekih an kharhkhum ruangah an zaten an thih thluh ngaingai ding an phan ruangah Jet Fighter le Helicopter thawn nasa zetin an ra do bawm. KNDF lam ihsin miralṭha pakhat in ram le miphun hrang nunnak a liam ih mi 6 in hriamhma an tuar, tiin an tarlang.
Ni khat sung lawngah Karenni PDF pawl in Kawl ralkap mi 80 hnakih tam an kap that cu an picang lawlaw si. Kum reipi ramhnuai ah hriamhreikai ih um pawl hrang hman ah Ni khat ih Kawl ralkap hi zatzat kah that cu thil awllo zet a si ding. Karenni PDF lam hi an rak picang nasa a si hi.
# Hithu hi Chin Net youtube ih tisuahmi Ca ih siar duhtu hrang kan post mi a si.
– Chin Net