Sagaing ramțhen Myaung peng le Salingyi peng ah November 20 ih ralkap motor pawl bomb thawn donak ah ralkap 8 an thi tiah theih a si.
Myaung peng Kyautyit khua le Naba khua karlak ah November 20 zinglam suimilam 9:00 ah țumkhat, Myaung khawpi luhsuahnak ah zinglam suimilam 9:30 ah țumkhat tiih ralkap pawl cu bomb thawn țumhnih do an si thu Myaung PDF ih ဗိုလ်သမန်းကျား in simnak a nei.
“Țumkhatnak bomb thawn kan do ah ralkap motor pakhat a ngah, curuangah Myaung khawpi ihsin ralkap pawl an ra sal, khawpi ihsin ra suaktu ralkap motor cu bomb thawn kan do sal, ralkap lam hi mi 7 an thi ih mi 5 hnakih tam hriamhma an ngah, kannih lam cu mithi kan um lo” tiah a sim.
Ralkap pawl cu bomb thawn do an ton ruangah Seyua (ဆယ်ရွာ) khua inn khat an urkang ih inn dang pawl ta khal thilri an siatsuah tiah theih a si.
Salingyi peng khalah November 20 ih ralkap pawl bomb thawn do an si ruangah ralkap 1 a thi ih mi 3 hriamhma an ngah tiah tualsungmi pawlin an sim.
Ralkap pawl cu motor thawn mi 100 hrawng ke ih an feh laifang Salingyi peng မြန်မာ-ဝမ်ပေါင်၊ မြန်မာ-ယန်စီ hnațuannak kiang ihkhun 16 siizung kiangah bomb thawn do an si tiah tualsungmi pakhat in a sim.
Bomb thawn dotu hi zo pawlkom timi theih a si hrih lo ih bomb a puak ihsin ralkap pawl cun meithal an kah ciamco ruangah mipi pawl cu thlaphang in khua an suahsan tiah theih a si.
