Myanmar ram thlanglam Karen ramkulh, Mon ramkulh, Taninthari ramțhen sungah July 25 ihsin ruahsur tilian ruangah minung 3000 hrawng cu hmunhimnak hawlin an vakvai tiah humhimnak lam pawlkom pawlin an sim.
Mon ramkulh sungah Mawlamyine, Yi, Caihmazaw le Chaungsone peng pawl ihsin a siih, Karen ramkulh sungah Hlaingbwe peng le Taninthari ramțhen sungah Lawnglung peng ihsin an si.
Ruahsur tilian harsatnak ruangah mithi le mihlo an um hrih lo na’n, minung 3000 hrawng cu hmunhimnak hawlin an vakvai tiah humhimnak lam pawlkom in an sim.
Karen ramkulh Hlaingbwe peng ahhin July 25 ihsin ruahpi a sur thok ih July 26 zinglam ahcun Dawnah tlangtluan ih tikua pawl a lian ruangah Hlaingbwe khawpi veng tampi ah a lut ih tilian a tlung tiah khuami pawlin an sim.
Mon ramkulh Mawlamyine, Yi, Caihmazaw le Chaungsone khawpi pawl khal July 25 ihsin Thanlwin tipi a liam ih, motor zin le veng tinkim cu tidai in a khuh.
