Myanmar ram sung tilian ruangah harsatnak a tongtu minung 30000 lenglo cu tangka ting 730 lenglo bomnak pek an si thu ralkap council ih nuntu khawsaknak, humhimnak le tundinsalnak tlangbawi zung ihsin theih a si.
2021 July 20 ihsin August zarhkhatnak tiang Karen ramkulh, Mon ramkulh, Taninthari ramțhen, Bago ramțhen, Rakhine ramkulh, Irrawaddy ramțhen pawl ah ruahsur tilian a thlen ruangah innsang 8300 lenglo ihsin minung 30000 lenglo cun harsatnak an tong ih an inn le Lo an suahsan. Hi tilian harsatnak tuartu pawl hrangah tangka ting 730 lenglo bomnak pek an si thu theih a si.
“August 5 tiang ahhin tidai niamnak hmun hrekkhat ahcun inn lam tlungtu khal an um, tilian harsatnak tuartu pawl hrangah Mask, kut kholhnak, satpia, Fang le thilri phunphun bom an siih, bomnak zaten ting 730 lenglo bomnak pek a si” tiah emergency management department zung ih țuanvo neitu mi pakhat in simnak a nei.
