Leitlun hmunkip ihsin Myanmar ralkap bomnak zaten cawl thluh dingah American telin leitlun ram 7 cun November 26 ah forhfialnak ca an suah. Myanmar ram ah ralkap pawlih milai covo an pahbalmi thuhla pawl thawn pehparin kan thin a nuam lo ngaingai tiah thusuahmi ahcun an tarlang.
Ralkap thuneihnak cemnak hrangah hriamhrei thawn dothlennak cangvaitu pawl do cimit dingin ralkap in an zuam natsat laifang a si. “Pukpi in an kap, vanzam in an kap, hriamhreipi an hmang ih ralkap thawngtel darh aw in doawknak an tuahmi parah thlaphan a si thu, ralkap pawl cun in kap ruangah kan kap an ti ko na’n tualsung mipi paria dik lo zetih an thiltuahmi ruangah thlaphan a si thu” thusuahmi ahcun an tarlang.
“Nunau sualpinak le hrem-awknak pawl thawn pehparmi thuhla pawl, a hleice rampi nitlaknak lam ah milai covo an pahbalnak thuhla pawl khal thusuahmi ahcun an tarlang. Myanmar ram nitlaknak lam ah ralkap acozah ih siatsuahnak ruangah minung thawngtel cun an umnak khua an suahsan.
Atui casuahtu ih tel ram pawl cu Myanmar ram hriamhrei phurhlut rak khamtu American, Australia, Canada, New Zealand, Norway, S. Korea le British an si.
