Naypyitaw khawpi ih Myanmar police force central office ah kilhimnak khoh zet karlak ah October 5 zaanlam ahcun bomb a puak tiah palik naivai hnen ihsin theih a si.
Police central office ih CID department office evidence thilri retnak room ah bomb cu a puak ih police Lt. Col. telin mi 4 hriamhma an ngah tiah hmin langter duh lo palik bawi pakhat in a sim.
Police central office cu police battallion pakhat in kilhimnak țuanvo an la ih lenglam ihsin a sung lut dingah ol lo zet a siih office sungah bomb a puak timi cu mangbangza rori a si tiah palik bawi in a sim.
CID office ih evidence thilri retnak room ah hmundang ihsin evidence thilri pawl cu parcel an phorh laifang ah bomb a puak tiah theih a si.
Bomb puaknak police central office hi Ministry of Home Affairs department le state administration council office karlak ih ummi zung a si.
Cuvek thotho in Naypyitaw ih immigration department hnațuantu pawl hmuak le thlahtu motor pakhat khal October 5 ahcun bomb thawn an siatsuah thu Naypyitaw PDF Information director Bo Ngwe Soe in simnak a nei.
