Zirtirtu chuan a zirlai te chu an thatna leh an hma hun tur ngaihtuah vangin zilhhau na an pe thin. Mahse inhmuhsitna lam rawngkai erawh chu a dan a dang leh daih a, a tuartu tan pawh paidam mai a harsa ani.
Belgium ram a mi kum 37 a upa Gunter Uwents chuan a tet lai, primary school a luhna a mualpho leh zak taka siam thin tu an zirtirtu chu kum 30 a liam hnu ah zawngchhuak in rawng takin a nunna a laksak tih hriat ani.
Gunter Uwents hian an zirtirtu thin kum 59 mi Verlinden chu an chenna Antwerp bul Herentals ah November, 2020 khan kalchilh in chemte in vawi 101 zet a vit a, Verlinden hian a nunna a chan phah.
He tualthahna case hi hun eng emaw chen chinfel theih a nilo a, DNA hmang te a investigation an nei chung pawn tualthattu hi an hre thei lo. Tualthahna hmun ah hian Verlinden purse, a chhunga pawisa awm chu engmah khawih chingpen loh in an hmu a, hei hian inrawkna leh rukruk vanga inthahna hi thleng a nih loh zia a tichiang hle.
Tualthah na thlen atang a thla 16 a liam ah Uwents hian a thil tih hi a thian pakhat hnen ah a sawichhuak ta a, hetah chiah hian hnuchhuina kawngah nasa taka puiin tualthattu hi an zawnchhuah theih phah. Uwents a’n DNA sample a pek leh tualthahna thlenna hmun a mi chu alo in mil ta chiah bawk.
Local prosecutors office lam ten Uwents hian a thil tihsual hi a in puang tawh tih an sawi a, 1990s a kum 7 mi lek a nih laiin an zirtirtu nu Verlinden hian midang hma ah hmusit leh diriam in mualpho takin a siam thin a, kum rei tak hnu ah pawh a theihnghilh thei lo. Phuba lak duhna a neih chu bengdai thei ngang lovin a chenna in ah kalchilh in a that tih a puang ani.
Tualthah vangin Uwents hi thubuai awrhtir nghal a ni a. Belgian media chuan an zirtirtu hlui thattu hi Christian sakhaw vuantu leh chenna in nei lo tanpui tura hma la tu zingah a tel ve tih an tarlang bawk.
