Sagaing ramțhen Monywa khawpi Ayeyikthar lamzin sethmuhzung ih nambat (2) palik zung cu November 23 zinglam suimilam 5:00 hrawngah bomb an denglut ih palik siatsuah aw le mithi an um ko ding tiah bomb dengtu hriamkai pawlkom NPRF cun thuthannak an nei.
“Bomb cu a puak, palik siatsuah aw an um, ziangzat an si timi cu theihfiang a si hrih lo” tiah NPRF cun an sim.
Palik zung kiangih um nunau pakhat khalin “tuizing zingpitte ah bomb puak ring zet kan thei, palik zung sung ihsin thawmvang hnok celcel kan thei, leng suak in kan zoh ngam lo, an kahawknak karlak ah in ngah pang ding kan phang ih kan zoh ngam lo, bomb puaknak cu nambat (2) palik zung a si, ziangmi a siat timi felfen kan thei lo” tiah a sim.
NPRF thuthannak ahcun bomb puak ruangah palik hriamhma tuar an um ko na’n cazin felfen theih a si hrih lo tiah an tarlang.
NPRF cun Sagaing ramțhen sungah țum 15 hnakih tam doawknak an cangvaih zo thu NPRF cun an sim.
Kan dung baite khalah Monywa khawpi nambat (2) palik cu do thawn an rak do zo. Monywa khawpi ah nambat (1) le (2) palik zung a um ih, hi palik zung pahnih cu tuletu do a tong ringring tiah theih a si.
