Sagaing ramțhen Monywa khawpi Industrial veng ah țuanvo nei in suksotu palik bokhat Win Kyaw Myo le palik pakhat cu October 26 zinglam suimilam 4:00 hrawngah tualsung hriamkai SIA in an kap that ih meithal le cerek an laksak thu SIA in simnak an nei.
SIA sungtel Bo Khun Sa in “KTV ah an ra timi kan thei ih, lamzin ihsin kan rak hngak ih kan kap, palik bokhat le palik nauta pakhat an thi, an kenmi meithal le cerek khal kan laksak ngah, kannih lam cu zohman hriamhma ngahtu kan um lo, ralkap uknak kan do sunzom vivo ding” tiah a sim.
Tuizing ihsin Monywa khawpi luhsuahnak zaten ralkap council cun kilhimnak an khohter ih kaih tongtu khal mi 3 hnakih tam an um tiah tualsungmi pawlin an sim.
Tufang hi Monywa khawpi ah bomb puak le kahawknak hi nitin deuh thaw in a um ih, October 25 khalah pitar putar umnak kiangih ralkap council hrekkhat bomb thawn do an ton ruangah mi pakhat a thi ih mi 5 hnakih tam hriamhma an ngah.
Tufang Monywa khawpi ih bomb puak le kahawknak cu Bo Khun Sa le Jingphaw Naransan tei pawlkom SIA ih kutneh a si thu October 26 ah thuthannak an nei.
October 26 zing ih palik 2 an kah thatmi ruak khal zinglam suimilam 6:00 hrawngah an ra sar ih zinzoinak khal an nei tiah theih a si.
