Sagaing ramțhen Monywa – Ayadaw lamzin ah ralkap motor pawl cu PDF komkhawm 7 cun November 23 ah Bomb thawn țum 4 an do ih ralkap 20 hnakih tam an thih hleiah hriamhma ngahtu an tam zet tiah သပြေညိုပြောက်ကျားတပ်ဖွဲ့ cun thuthannak an nei.
November 23 zinglam suimilam 5:30 ah Monywa ihsin Ayadaw lam ih fehtu ralkap Truck motor 2 cu Donetinkan kiangah hriamhreipi thawn an kap ih ralkap 5 an thi, hriamhma ngahtu khal an um tiah theiha si.
November 23 zinglam suimilam 10:15 ah nambat 369 pukpi ralkap pawl cu Ayadaw – Monywa lam feh ih an tomi bike 4 cu bomb 2 thawn do an siih, ralkap 7 an thi, mi pakhat hriamhma a ngah thu သပြေညိုပြောက်ကျားအဖွဲ့ cun an sim.
Zinglam suimilam 11:40 hrawngah Ayadaw ihsin private motor 3 thawn feh suaktu ralkap pawl cu Donetinkan kiangah bomb pakhat thawn do an siih, mi 3 hriamhma an ngah thu, sundir suimilam 12:45 hrawngah cekfelnak tuah dingih ra thlengtu ralkap pawl cu a tanglaimi bomb pakhat thawn do sal an siih, mi 8 an thih hleiah hriamhma ngahtu an tam zet thu သပြေညိုပြောက်ကျားတပ်ဖွဲ့ cun thuthannak ah an tarlang.
Bomb thawn ralkap pawl dotu hriamkai pawl cu သပြေညို ပြောက်ကျားတပ်ဖွဲ့၊ Knights Of The Red Land (KORL) ပြောက်ကျားတပ်ဖွဲ့၊ Ayadaw Falcon Force (AF2)၊ တမန်တော်ပြောက်ကျားတပ်ဖွဲ့၊ Ayadaw Bone Naing PDF- (ABN-PDF)၊ People’s Guerillas Commendo-Myinmu le M.R.T.F pawl an si thu theih a si.
