Mogoke khawpi nitlaknak lam Yioogyi phunhra tlawnginn kiangah bomb vei 4 a puak ih ralkap 3 an thi, hriamhma tuartu an tam zet tiah tualsungmi pawlin an sim.
November 11 sundir suimilam 12:30 hrawngah bomb pakhat a puak ih ralkap pawl an ra thleng laifang ah bomb 3 a puak sal tiah theih a si.
“Hmaisa cu thawmvang neimi men bomb a si ding, zohman a siatsuah lo, bomb puak ti cun ralkap pawl an ra thleng, cumi ah bomb 3 a puak sal, ralkap 3 an thi ih, mi 5 hriamhma an ngah tiah kiangkap naivai ih um mi pakhat in a sim.
Bomb puaknak kiangkap cu ralkap pawlin an phit ih lamzin suksotu pawl an cek rero tiah theih a si. Hi bomb puak thawn pehparin zawi pawlkom khalin kan tuahmi a si tiah thusuah tuahtu an um hrih lo.
