Mandalay ramțhen Mogok khawpi Minthada veng Aungme tlawng kianah August 22 zaanlam suimilam 3:00 hrawngah bomb a puak ih a kiangih retmi palik motor pakhat a siat tiah tualsungmi pawl hnen ihsin theih a si.
“Bomb puak thawmvang ring zet kan thei, bomb puaknak kiangih inn tukverh pawl khal a kek thluh, palik motor pakhat a siatral, hriamhma tuar le mithi an um lo, ambulance awn khal kan thei lo” tualsungmi pakhat in simnak a nei.
Hi bomb puahnak Aungme tlawnginn ah August 21 zaan ihsin ralkap pawlin an luah ih palik motor hi tlawnginn hmai hmun lawng pakhat ih an retnak ihsin bomb a puak tiah theih a si.
Palik motor bomb puahnak ruangah mithi hriamhma tuartu an um loih ralkap pawl cu August 22 zinglam ahkhan mipi thuamhnaw thawn meithal keng in khawlak ah an sukso rero tiah tualsungmi pawl hnen ihsin theih a si.
