August 1 zaan suimilam 9:00 hrawngah Moe-mouh penguk le venglal meithal thawn an kap tiah khuami pawl hnen ihsin theih a si.
Penguk thar cu venglal pawl tonnak a nei ih a tlun lam ah zo pawlkom timi theih lo hriamkai in meithal thawn an kah thu khuami pakhat in a sim.
“Zaan ah penguk cu venglal pawl tonnak a nei, a tlun lamah meithal thawn an kap, penguk le venglal pakhat cerek in a ngah, meithal thawmvang cu a hnok nasa” tiah khuami pakhat cun a simfiang.
Meithal ih kah tongtu cu Hlaingthayar peng ihsin Moe-mouh peng penguk ah a țhawntu U Kyaw Swe le venglal pakhat an si. An hriamhma cu Bamaw siizung ah tuamhlawm dingin an fehpi thu khuami pawlin an sim.
Penguk U Kyaw Swe cu siizung a thlen ah a nunnak a um nawn lo tiah theih a si.
Kan dung May 14 khalah Moe-mouh penguk zung ih bomb puak ruangah minung 4 in hriamhma an rak tuar dah zo.
