Kokang ralkap tiah mi tampi ih theih larmi MNDAA le ralkap karlak doawknak ah ralkap 198 an thi tiah MNDAA hnen ihsin theih a si.
MNDAA le ralkap pawl cu July – November tiang Shan ramkulh saklam Mungku peng sungah țum 263 an kah-awk thu, cui doawknak ah ralkap 198 an thi ih mi 700 hrawngin hriamhma an ngah thu MNDAA thusimtu Li Thian Pu in simnak a nei.
Hi doawknak ah MNDAA lam khalin minung 10 an thi ih mi 50 lenglo in hriamhma an ngah tiah a sim bet.
“Ahlan ihsin thuthannak kan rak tuah zo, Covid – 19 khamnak hnațuan cu nasazet ih țuan dingah dung kan sipsal ko na’n, ralkap lam ih doawknak an cangvaih ciamco ruangah kannih lam khal kham aw in kan rak do, curuangah doawknak a um ringring” tiah Li Thian Pu in a sim.
Ralkap pawl cun Myanmar ram sungih hriamkai pawl cu do dingah tumtahnak nei in an cangvaih rero thu, MNDAA cu mipi thawn ding tlangin a dikmi Federal rampi sersuak ding an ruahsan thu” a sim bet.
Li Thian Pu cun Mungku ah kan cangvaihnak a rei tuk zo, thuhla a suahnak bik cu khatawk ah Covid – 19 a um ih tuamhlawm dingih kan feh caan ah ralkap pawlin thuhla an thei ih doawknak an tuah, curuangah doawknak khal a suak, annih in doawknak an tuah ahcun kannih khal rak kham aw ih kan do ve si ko” tiah a sim.
Doawknak ah ralkap lam mithi tam zet an um vekin hriamhrei thilri khal MNDAA cun tam zet an laksak ngah. Tufang hi ralkap brigade 77 hnuaiih battallion 10 le brigade 99 hnuaiih battallion hrekkhat cu Mungku hmunram ah an cangvai rero tiah MNDAA hnen ihsin theih a si.
