Shan ramkulh saklam Kokang hmunram ah ralkap thazang bettu ralkap motor pawl cu Thingni le Mungku peng sungah MNDAA in an do ih ralkap motor 9 a siat thu The Kokang media in a tarlang.
November 11 zinglam ah Thingni distric Namsalat ihsin Kokang, Kunlung hmunram ah raldo bawm dingin ralkap pawl cu motor 28 thawn an ra feh ih MNDAA in an rak kap ih motor 2 a siat thu, zaanlam nazi 3:57 ah peng țhuam 37 – 38 karlak ah hi ralkap motor pawl cu MNDAA in an kap sal ih motor 5 a siat thu theih a si.
Cuvek thotho in Mungku hmunram Huachawng Siasun tlangtluan ah ralkap motor pawl cu an kap ih motor 2 a siat thu, zinglam nazi 10:43 ah Mungku distric Panyinlapa ih MNDAA rakhan do dingah fehtu ralkap pawl thawn zaanlam nazi 3:50 hrawngah doawknak a suah thu The Kokang Media cun a tarlang.
Cuihleiah Mungku distric Manpha hmunram le Thingni distric Panlung khua khalah doawknak a um thu a tarlang ih mithi an um le um lo cu tarlang a si hrih lo.
Mungku le Phawngseng karlak ih MNDAA hmainawr sakhan pathum cu November 9 ah suahsan dingin MNDAA thusimtu Lithianphu cun simnak a rak neiih ralkap le MNDAA karlak cu doawknak a um rero lai thotho tiah theih a si.
