Ralkap le MNDAA cu Mungku hmunram ah November 17 zinglam ihsin an kap aw sal ih ralkap hriamhrei an laksak sal thu The Kokang media ihsin thuthannak an nei.
Ralkap le MNDAA cu November 16 zinglam suimilam 8:40 hrawngah Muban hmunram Manli khua kiangah an rak kap aw ih ralkap 2 an thi, MNDAA lam ihsin mi hrekkhat hriamhma an ngah tiah theih a si.
MNDAA in ralkap hriamhrei an laksak salmi pawl cu MA meithal pakhat, a cerek bawm le cerek pawl, kutden bomb pawl, Egana bomb fate pawl, 40mm cerek pawl le RPG cerek pawl an tel. MNDAA cun November 16 khalah ralkap pakhat ih ruak ruh lawng an tangmi an hmu ih hriamhrei pawl khal an rak laksak zo.
Cuvek thotho in Mungku peng Je Jan Shine hmunram ah ralkap pawl le MNDAA battallion 511 cu November 16 zaanlam suimilam 1:23 – 4:10 tiang an kah awk thu, ralkap lam mithi theihfiang a si hrih lo thu, MNDAA lam ihsin hriamhma ngahtu an um lo thu The Kokang media cun a tarlang.
Mungku hmunram thlacamnak tlang kiangkap ah MNDAA pawl cun hmunram thianfainak an tuah laifang ah ralkap pawlih tlansanmi hrekkhat hrekkhat an laksak ngah tiah theih a si.
