MNDAA hmunram ah doawknak cangvai dingin ralkap pawl cun motor 18 thawn ralkap le hriamkai tam zet phurin November 2 zaanlam ah Kokang distric ram laifannak an lut tiah theih a si.
Hi motor 18 cu Lokai khawpi ih Sihsan hmunram ihsin Tharshwethan lamah an lut ih motor 6 ah hriamhrei khat țhepțhep in an phur ih a dang motor pawl ah ralkap an phur tiah theih a si.
November 12 zinglam suimilam 8:30 hrawngah Kokang distric le Mungku distric Manpha lam ih umtu ralkap pawl cun MNDAA umnak Mungku hmunram cu hriamhreipi thawn an kah thu, zaanlam suimilam 2:00 hrawng ihsin suimilam 4:00 hrawng tiang Panyinlapa tlangpar ih MNDAA sakhan an kah thu, zaanlam suimilam 2:30 hrawngah Lashio – Thingni lamzin peng țhuam 14 kiangih Phulung nitlaknak tlangtluan ih doawknak a um hleiah Chichupa, Lawku Lorithan hmunram khalah doawknak a um tiah theih a si.
November 11 khalah Thingni distric Namsalat ihsin Kokang, Kunlung hmunram ih raldo bawm dingin fehtu ralkap motor 28 cu MNDAA in an kap ih ralkap motor 9 a siat tiah theih a si.
Tufang hi ralkap le MNDAA cu Kokang distric le Thingni distric sungah cat loin an kap aw rero tiah theih a si.
