September 10 ih India – Myanmar ramri Chin ramkulh Thantlang peng lungler khua ah ralkap council hriamkai le CNA/ CDF an kahawk hnuah ralkap lam in vanzam thawi bomb an thlak hnu Mizoram sungih tlantu mi 2000 an kim zo thu theih a si.
Chin ramkulh sung doawknak ruangah khua le ram suahsantu pawl cu India – Myanmar ramri Mizoram ramkulh sung Champhai distric, Hnahthial distric le Lawngtlai distric pawl ah an tlan suak.
Mizoram ramkulh acozah le tualsungmi pawlin acozah tlawnginn hall pawl ah um khawmnak an tuahsak ih an țulsammi ei-in, thuamhnaw, puan, harhdamnak le Covid – 19 ceknak khal an tuahsak. Raltlan pawl hnen ihsin Covid – 19 positive an um hrih lo tiah The Aizawl Post in a tarlang.
Mizoram ramkulh sungah nikhat hnu nikhat raltlan an karh vivo ih mipum felfaiten theihfiang a si lo nan’ a tlangpi thu in Hnahthial distric sungah an tam bik ih mi 1500 lenglo an kim. September 14 tiang cazin ngahmi vek asile Hnahthial distric sung Thingsai khua ah mi 504, Cherhlun khua ah mi 105, Ngharchhip khua ah mi 103, Ngharchhip khawthar ah mi 300, Khawhri khua ah mi 80, Tarpho khua ah mi 80, Chawngtui khua ah mi 20, Bualpui H ah mi 100 an si.
Champhai distric sung khalah mi 500 lenglo an lut ih Farkawn khua ah mi 106, Vaphai khua ah mi 184, Khankawn khua ah mi 61, Dungtlang khua ah mi 10, Thekte khua ah mi 51, Thekpui khua ah mi 46, Khawbung khua ah mi 34, Khuangleng khua ah mi 25, Zawlsei khua ah mi 3 an si tiah theih a si.
Lawngtlai peng sung khalah raltlan innsang 204, mipum 900 hrawng an um ih, cumi lak ihsin kum upa le nauhak an tam thu theih a si. Lawngtlai peng sung Sangau (1) ah mi 133, Sangau (2) ah mi 106, Sangau (3) ah mi 61, Sangau (4) ah mi 83, Thaltlang khua ah mi 42, Sentet Fiang khua ah mi 41, Lungtian khua (1-2) ah mi 33, South Lungpher khua ah mi 50, Bualpui khua ah mi 136, Lungzarhtuma khua ah mi 20, Lungzarhtum Tlangpui khua ah mi 3, Vawmbuk khua ah mi 75, Archhung khua ah mi 55, Tialdawngi Lung khua ah mi 40, Siachangkawn khua ah mi 22 an um.
Mizoram ramkulh sungah raltlan luttu ding minung tam zet a um hrih lai tiah theih a siih, atui dinhmun ahhin Mizoram ramkulh sungah Myanmar raltlan mipum 10000 lenglo an kim zo tiah theih a si.
Ref : Khonumthung
