Khawvel kalphung hi a letling vel vek tawh a nih ber hi. Tunlai ah chuan mahni anpui inkawp hi thil thar danglam vak a ni tawh lo a, ram thenkhat ah chuan dan in a phalsak hmiah tawh.
Beauty Pageant a ram khat nula chhuanvawr ve ve Miss Argentina, Mariana Varela leh Miss Puerto Rico, Fabiola Valentín te chuan khawvel hriat ah an inneih thu an puangzar thut mai.
An pahnih hian 2020 a Miss Grand International (MGI) thlanna ah khan intawng in an inhmelhriat tan a, an inkara inpawhna erawh inthianthatna satliah ringawt alo ni hauh lo. Kum 2 chhung chu an inkara thil thleng hi midang hriatah zep in a rukin an lo inngaizawng reng tawh zawk a ni.
October 30 ah khan Social Media ah thuchhuah siam in an inneih thu hi an puang a, an video hrang hrang te dah langin, an thu dehkilh dan atang chuan October 28 ah kut an insuih a ni.
An inneih thu an puan hnu hian MGI pageant a an contestant pui ten lawmpuina thu an hlan sup sup hlawm. Puerto Rico ah hian 2015 atangin neih in ang inkawp leh inneih hi danin a phal a, Argentina hian 2010 khan anpui kawp hi a remti bawk. Mahse Kristian te tan erawh chuan thil ni thei lo leh awm ang lo tak a ni thung.
