Tualsung hriamkai le ralkap karlak doawknak ruangah thlaruk lenglo khualtlawng sukso lonak hmun Mindat – Matupi lamzin cu atu ahhim ralkap siseh, tualsung hriamkai siseh, khatlam khatlam thuhla theiter in feh a ngah tiah tualsung thilri phurtu pakhat in simnak a nei.
“Atu cu khatlam khatlam thuhla theiter ih feh ahcun țihnung a um lo, kannih khal man khung zetin thilri zuar kan duh lo, asina’n lamzin feh man lethnih a si, petrol cem dan khal lethnih kiangkap a si tikah thilri man a kai, atu hitin lamzin a tlung vivo ahcun Matupi hrangah thilri man khal a kelte ah a cang leh ko ding” tiah a sim.
Mindat – Matupi lamzin hi thlaruk lenglo phih a si ruangah Matupi khawpi ih thilri kuat tikah Pakokko – Kankaw – Rezua lamzin hman a siih, peng 200 lenglo a hlat tikah thilri man khal a kainak a si tiah a sim bet.
Matupi – Mindat lamzin hman theih a si ahcun khualtlawng motor le thilri phur motor pawl dinhmun in Matupi hrambun ralkap battallion ah report tuah ih CDF – Matupi le CDF – Mindat hndnah report tuah in feh theih a si tiah an sim.
Kan dung zarh ah Pakokko ihsin Matupi ih zatlang pawlkom motor pakhat cu mina phur in Matupi ah hi lamzin zawh in a ra thleng. Tuizing khalah Matupi ihsin motor 6 an feh tiah Matupi khawpi ih um mi pakhat in simnak a nei.
