Helicopter thawn bomb an thlakmi pawl cu Mindat khawpi peng 14 timi ah pahnih a tlan, နတလ tlawng campus sung, phungki tlawng ah pathum an tla, tiin khawsungmi cun an sim. Mizan ah khan Jet Fighter rori hman Mindat khawpi tlun ah a zam tiin an sim. Kawl ralkap suamhmang pawl cun ziangkhawsawnlo zetin Mindat khawpi sungah duhtawkin hriamhreipi an kap lut, meithal in mipi an kap, tu tiangah mipi lam nunnak liam le hriamhma tuar ziangzat cekci an um timi theihfiang a si hrih lo. Tuisun Ni khat lawngah Mindat khaw sungih Kawl ralkap suamhmang pawlin hriamhreipi an kahmi hi vei 60 hnakin a tam ding, tiin an sim.
Tuisun Mindat khawpi sung doawknak a natsat tuk ruangah CDF_Mindat pawl dung an sip sung. မင်းတပ်ပြည်သူ့အုပ်ချုပ်ရေး-သတင်းအဖွဲ့ cun KIA le KNU pawl an donak hman ah hitluk lawmam thazang tam ni khat ah an hmang lo. Chin ramkulh sungih khawpi fate zetmi pakhat Lai meithal zuun khat te lawng a puak theimi hmangin rak humhimtu pawl donak ah, Artillery, Pukpi, RPG hriamhreipi, Bomb siseh Helicopter tiangtiang hmangin hitluk lawmam thanzang tampi le ralthuam hriamhreipi an hman hi cu a ṭul lo tuk.
Tuisun ni khat sungte lawng hman ah Mindat khawpi dotu suamhmang ralkap pawl bawmtu Helicopter vei 30 lai an va leuhleuh. Helicopter ihsin in kap bet fawn. Zinglam nazi 7 ihsin zanlam nazi 3 tiang rori khawsung mipu umnak ah hriamhreipi thawn cawl loin an kap. Bomb an thlakmi ih a ngahmi hriamhma tuar mipi pawl khal tuamhlawm theih an si fawn lo. Cun mipi kilvengtu CDF Mindat pawl cun khawsung mipi pawl, Dawr pawl le minung umnak inn pawl an kah siat natsat tuk ding an phan ruangah dung an sipsan sung.
Tuvekin Lai meithal zun khat telawng puak theimi donak ah Kawl ralkap suamhmang pawlin hi tluk hriamhreipi le an ralkap thazang tam zet an hmang timi hi cu Ralkah thiam lo, santlai lo zet an sinak a lang sawn a si. Anmah vekih hriamhrei ṭha neimi parah hmuah hivekin an cangvai ngam fawn lo. Himi in kan zir thiam ding cu mipum a malmi, thazang acaklomi pawl hi Kawl miphun hi cun pal cimih rori an tum. Zovek Kawl miphun khal mipum malsawn mi le thazang acaklo mi neek rawk tumtu pohpoh cu kan do vivo a ṭul ko.
Sim zo bangin venghnen pengdang pawl khal an cangvaih taktak a cu tuk thlang. Mindat mipi an tuar na tuk thlang, tuvek caan ah khat le khat kan bawmawk lo asi ahcun kan caktheilo ding. Ṭanrual caan a si, ṭangrual uh si, lungkhat pu in Kawl ralkap suamhmang hi do uh si. Vansanglam ih um rerotu kan unau Mindat mipi hrangah siseh Mindat mipi kilvengtupawl hrang ah siseh Thlacamnak nasa sinsin in kan neihsak cio kei uh. Tuiṭum cu Mindat kan unau pawl tuarnak pawl ruah tikah ning hi a na tuk, thuthang dang khal kan run tisuak theilo a si hi.