Chin ramkulh thlanglam Mindat khawpi ah July 22 zaan suimilam 11:00 hrawngah harhdamnak lam acozah hnațuantu pakhat ih inn cu hriamkai burkhat in meithal thawi an kah ruangah harhdamnak hnațuantu hriamhma a ngah ih a fapa a thi tiah theih a si.
Health department ah cangantu (cazi) a simi Pu Pau Chan cu a hngawng ah meithal hriamhma tuar in a tlansuak ih an inn khal a kang tiah inn kiangkap pawlin an sim.
“Meithal puak thawmvang kan thei, zaan a siih Martial Law a si ruangah zohman leng kan suak ngam lo, a thaizing ah kan va zoh cu inn hnuai kiangah a fapa ih ruak kan hmu” tiah an sim.
Pu Pau Chan cu CDF le ralkap karlak doawknak ruangih a tlannak hmun ihsin a ra kirsalnak a rei hrih lo tiah khuami pawlin an sim.
Pu Pau Chan fapa ih ruak cu sungkhat le inn kiangkap minung pawlin țuanvo la tahratin kan vui ih, tuini tiangah zo pawlkom in kutneh a si timi kan thei hrih lo tiah khuami pawlin an sim.
