Pop star, Justin Bieber nupui American model, Hailey Bieber (kum 25) chuan social media lama beihna nasa tak a dawng chu a ning ve ta ngang a niang. Amah haw tu te hnenah a lak atanga inthiarfihlim turin a hrilh.
Hailey Bieber hi a pasal Justin Bieber nen an inneih hnu atang in online lam ah zarbuaina leh huatna thu tam tak a dawng fo thin a. Mahse Hailey hian tawngkam dengkhawng leh amah huatna lam a dawn na zawng ah engmah chhanna a pek sawi tur a awm vak ngai lo.
Tiktok a video a post ah chuan Hailey hian amah haw tu te hnenah engmah thusawi a neih ngai loh thu leh engthil mah tih dikloh a nei lo chunga an tibuai fo thin chu hriatthiam har a ti hle a, an hua anih chuan amah kalsan turin a ti.
Post a siam ah hian a thil post a piang a comment fo tu te tan a thupuan a nih thu a dah a. “Tumah zarbuai ka neilo, buaina siam leh engmah sawi ka nei bawk hek lo. Khawngaih in ka ngen che u, keimah in min awmtir ula hmun dangah lo inthiarfihlim mai teh u. Hei hi ka ngenna tak tak ani” tiin amah haw tu te chu tlang takin a hrilh.
Amah haw tu te hma a hetiang thu a sawi chhan ah hian Hailey hian a chhan chiang tak engmah a sawi hran lo. Mahsela a pasal Justin Bieber nen an inkar thawm a awm tirh atang in khaihlak lovin sawichhiatna a dawng reng thin.
Justin Bieber hian Hailey nen an intawn hma in Selena Gomez nen kum 8 zet ni leh nilo ang reng in an inzui a, kum 2018 a an inthlahfel hnu khan fans ten Hailey Bieber laka an lungawilohna an tihlan hmuh tur a tam zui viau bawk ani.
2019 a Selena Gomez in a hla ‘Lose You To Love Me’ a tihchhuah ah ‘In two months you replaced us / Like it was easy’ tia hla thu a dah chu Justin a tihchhan ni ah an ngai a. Selena Gomez hla thar tihchhuah ah hian Hailey pawh a kangkai rang leh nghal hle.
Fans tam tak in Hailey an beih zui tak chiam ah hian Selena Gomez in alo hriatin midang rilru tina zawng a che lo turin a fans te chu a khap dai hial ani.
