Zaithiam che mak sak ve thei tak thin Miley Cyrus chuan a pasal then tak Actor, Liam Hemsworth nen an inneihna chungchang a sawichhuak ve mial a. Mahse Miley hian Liam nena an innei kha lawm in a hlimpui hran teh chiam lo tih a tawngkam atang in a hriat.
Brazil khawpui a Lollapalooza festival ah Miley Cyrus hian perform na a nei a. Hetah hian mahni anpui kawp gay couple te inhualna tura palai atan tangin stage ah hun remchang alo buatsaih sak ani.
Miley hian inhual thar te hi lawmpuina thu hlan in, an inneih na chu amah ai ngawt in a kaltluan zawk a beisei in a duhsak zia a hrilh a. Liam nena an inneihna chu sawikai tel zeuh in vanduaina rapthlak ‘f****** disaster’ tiin a sawi zui.
‘Prisoner’ singer leh ‘The Hunger Games’ actor, Liam Hemsworth te hi an intawnna a rei tawh hle. 2010 a an film chan dunna ‘The Last Song’ atang in an inkawp tan a. Hetih lai hian khawthlang milar inkawp zinga ngaihven ber pawl an ni hial bawk.
May 2012 ah a vawikhat nan inhualin mahse September 2013 ah an inthen thu an puang. Liam nen an inthen hnu ah Miley Cyrus hi vantlang hma ah langsar khawpin a nungchang a inthlak danglam nasa a, thuamhnaw a inbel duh zawng te pawh a rawn maksak chho sawt hle ani.
Hun eng emaw chen an inthlah hnu ah 2016 khan an inkawp leh a. December 2018 alo herchhuah meuh chuan khawthlang media ten an inneih thu an rawn puangzar ta. Nupa hlim tak leh inkawp rem tak ni tura fans ten duhsakna an hlan liam liam hnu ah an inthen thu in news luah in January 2020 ah an inthenna hi tihfel ani. Miley hian Liam nen nupa an nihna chungchang ah hian mite hriat siloh buaihnawk tak a inphum tih a puang nghe nghe bawk.
Liam Hemsworth nen an inthenna an tih fel hnu ah Miley Cyrus hi ‘move on’ thuaiin Australian singer, Cody Simpson nen uluk takin an inkawp a. Mahse Cody nen pawh thla 10 zen zawn an in date hnu ah an inthen leh. Hemi hnu hian Miley in ual au takin vantlang hriat ah kawppui dang a nei zui tawh lo.
