Lemchan thiam nupa Ashton Kutcher leh a nupui Mila Kunis te chuan Russia in a rûn mek Ukraine mipui te tanpui nan pawisa khawnin, refugees te tan sum tam tak an hmuchhuak.
Mila Kunis, 38 hi Chernivtsi, Ukraine a piang a ni a, kum 7 a nih ah Ukraine chhuahsan in United State ah an pem a ni. March 3 ah Ukraine tanpui nan hian an nupa in GoFundMe buatsaih in $35 million zet tanpuina pawisa hi a tlingkhawm hman.
Heng pawisa an hmuhchhuah te hi San Francisco-based companies Flexport leh Airbnb te kaltlangin an pe dawn a, Flexport hi freight transportation company an ni. Ashton Kutcher nupa chungah hian President Volodymyr Zelensky pawh a lawm hle a, ram tana an thil tih ropui tak vangin video call hmangin lawmthu a hrilh.
A tirah tak chuan tanpuina sum hi $30 million vel hmuh tlin an inbeisei a. Mahsela mi thilphal leh tlawmngai tak tak te zar ah an beisei phak bak aia tam an hmuchhuak zawk. Mi 65,000 chuang zetin tanpuina sum hi an chhunglut ani. United Nations data atanga a landan in Ukraine mipui indona avanga an ram chhuahsan tawh hi 3.2 million zet an tling tawh.
