Middle East a kum 10 chuang lai a chhung ten nun nuam zawk an neih theih nan a hnathawk a lo awm tawh chu vanduaithlak takin a nunna a chan a, mahse a chhung ten a ruang an hlawm sak duh lo tih hriat a ni.
Dubai-based NRI social worker Ashraf Thamarassery hi Middle East a India khua leh tui vanduaina tawk a nunna chan te ruang thawn let hna a thawk thin a, ruang thawn tura a bawihsawm zingah hian kum 62 a upa pa pakhat chu a nupui ten a ruang an dawng duh lo tih a sawi.
Ashraf hian Facebook post a siam ah Middle East a nunna chan pa khawngaihthlak hi kum 10 lai hna a thawk tawh a, kum 5 chhung chu an chenna ah a haw tawh lo. Chhun leh zan in hna a thawk a, amah pawh thil ei mumal lovin India ah a chhungte hnen ah pawisa hi a thawn thin.
Kar liam ta lawk ah a boral a, a chhungte hnen ah a thih thu hi zualko in mahse a nupui leh a fate 2 in chhanna an lo pek dan chu beisei loh tak a ni a, an pa ruang hi hmuh kir an duh lo a,Police te hnen ah a nupui hian a pasal ruang chu hlawm a duh lo tih a hrilh a ni.
Ashraf ngei pawh nunna chan pa lainatawm tak nupui in chhanna a pek dan chu mak a ti hle a, an tan a theihtawp chhuah a hnathawk a ramdanga awm a pasal chu a tawp nan tal pawh vawikhat chiah hmuh leh hram an duh a rin lai a, a ruang an ngaihsak duh lo chu a ring thei lo hial zawk. A nupui ber in ruang a dawn duh loh takah chuan mihrang hrang an biak kual hnu ah a unaunu chuan a ruang chu thlahliam turin dawn alo remti.
“A boral hnu ah pawh a ruang zahna lantir na an nei lo. Hetiang hi tumah in an tawn ve loh nan ka tawngtai hial a ni” tiin Ashraf chuan nunna chan pa khawngaihthlak tak hi a lainat zia a sawi bawk.
