Yangon ramțhen Bothathawng peng lamzin 48-nak Urban Asia Center ih KBZ bank cu October 22 zaanlam suimilam 1:15 hrawngah an ram ih ting 3000 an la tiah theih a si.
“Tuini zaanlam suimilam 1:00 hrawngah minung 6 cun meithal keng im bank sung an lut ih sangka an kharter hnuah bank a ram, tangka ziangzat an la suak timi kan thei lo, tangka ra suahtu minung 6 ih phone pawl an laksak tiah kan thei” tiah veng sung mi pakhat in a sim.
Zo timi theih lo minung 6 cu bank sungah lut in sangka pawl an kharter thluh hnuah counter parih tangka ting 3000 an lak hleiah bank ih tangka ra suahtu mi 6 ih phone pawl khal an laksak tiah țuanvo neitu pakhat in a sim.
Tufang ahcun palik le ralkap pawlin lamzin 47/48 le maha bandula lamzin pawl ah motor sukso an cek rero tiah veng sung mi pawl hnen in theih a si.
Kan dung baite khalah Yangon ramțhen Mayangone le S. Okkalapa ih Global Treasure Bank, Bago le Inthakaw khawpi ih AYA branch le KBZ branch 106 pawl khal an rak ram dah zo tiah theih a si.
