England Lalnu ber Queen Elizabeth II thihna avangin Senior working royal member an nihna atanga inhnukdawk Prince Harry leh a nupui Meghan Markle te pawh Lalnu hun tawp ber hmang turin United Kingdom ah an awm mek.
Lal chhungkaw ngaisang tu mitam tak in an lo lawm em em laiin, a then te erawh chuan Prince Harry leh a nupui Meghan te hi an lawm vak lo niin an sawi a, mipui te ah an tla na lo tih a chianna chu Meghan Markle in mipui pungkhawm te a chibai kualna ah hian a chiang ang.
Inrinni khan Meghan hi Windsor Castle ah a pasal Prince Harry bakah a pasal unaupa Prince William leh a nupui Kate Middleton te nen an rawn inlan ho a, television cameras chuan an che tla lai vel hi alo ngaihven reng bawk.
Hetah hian ‘Duchess of Sussex’ hian mipui pungkhawm zinga mi te chu a chibai kual a, hmeichhe pahnih te chuan Meghan hi an lawm vak lo tih hriat theih turin chibai pawh an chibai duh lo a, pakhat zawk phei chuan sunglass vuah in Meghan in a chibai loh nan hrelo ni awm takin phone a khawih san daih in an sawi.
Social Media ah he thil hi mitam tak sawi a hlawh leh nghal viau a, mi pakhat chuan Meghan hi UK ah lawm a hlawh hlawl lo, California ah let leh vat zawk rawh se a ti a,Duchess of Netflix tiin a ko zui bawk.
Meghan-i duh tu te erawh in a thlavang rawn hauh in zahawm leh hawihhawm taka a chhawn chung pawh in an lo ngaihven duh lo a nih chuan a thiam lohna reng a awm lo tiin an sawi.
Queen thihna a Prince Harry te nupa leh Prince William te nupa inlan hi March 2020 a Commonwealth Day hnu ah hmuh ho an nih leh hmasak berna a ni a, Prince Harry te nupa hian Interview vel a an thil sawi tawh te vang khan a u te nen an inkar boruak a tha lo nia sawi neuh neuh tam tak a awm bawk a ni.
