Rampi thuneihnak la tahratin mipi a that rerotu Min Aung Hlaing cu China in chairman țuan ih tuah dingmi thurel khawmnak ah tel dingin ASEAN ram pawl cu China Asia Affairs special Ambassador Sun Guoxiang cun lem sawmnak a tuah rero na’n ASEAN ram hrekkhat in an cohlang lo tiah Reuters thuthang sirhsan in theih a si.
ASEAN hruaitu pawl cun ASEAN lungkim thutluknak tuahmi pawl cu a thlun lotu Myanmar ralkap lubik Min Aung Hlaing cu ASEAN meeting ah tel lo dingin an rak phial.
Indonisia, Brunei, Malaysia le Singapore cun Min Aung Hlaing cu November 22 ih tuah dingmi China – ASEAN meeting ah phial ding an duh thu Ambassador le ramkhel media 4 cun an sim.
Malaysia, Indonisia, Singapore le Brunei pawl cun ASEAN thupom cu kilkhawi vivo dingah an lungkim thu Reuters thuthang cun a sim.
Indonisia ih Ministry Of Foreign department ih thusimtu Faizasyah cun October ASEAN meeting hlan ih hruaitu pawl lungkim thutluknak parah an din peh vivo thu simnak a nei.
“Indonisia cu a ralai dingmi hruaitu pawl thurelnak ah Myanmar thawn pehparin tuihlan vek thotho in Indonisia cu kan ding a si” tiah Faizasyah cun a sim.
Myanmar ram democracy an sersuak lai hlan lo Myanmar cu ramkhel thuhla ah meeting palai kai ding sian si hlahseh timi cu an kai fengfeng lai.
Malaysia, Singapore, Brunei le Vietnam ram ih ramleng tlangbawi pawl cun zianghman țong suakmi an nei lo na’n a hram thok ih thutluknak tuahmi vekin an din ringring thu ambassador pawl an sim.
China ram ih ministry of foreign department zung ih thusimtu Zhao Lijian cun November 16 ah China cu ramkhel thuhla ah Myanmar ram ih party zaten kan dinpi ih remdaihnak le democracy sersuak sal dingin leitlun ram pawl thawn hna kan țuantlang ding tiah a rak sim.
November 22 ih tuah dingmi China – ASEAN thurel khawmnak ah China president Xi Jinping amah rori in chairman a țuan ding tiah theih a si.
