Yangon ramțhen Mayangone peng vengkhatnak ukawknak zung cu November 7 zaanlam nazi 1:20 ah zo timi theih lo hriamkai pawlkom in an kap ih ukawknak lam hnațuantu mi 3 an thi tiah theih a si.
“Zung sung a lut ih an kap, meithal zun 20 hrawng an kap, mi 3 an thi, ambulance motor 4 an ra, a kaptu pawl cu anmai tuahmi lo vekin hnangam takin an suaksal men, atu cu ralkap le palik pawl cun mi an cek rero ih kaihmi khal an nei” tiah kiangkap umtu pakhat in a sim.
Hi meithal kahnak ah venglal U Ngian Hlaing cu zung ah a um loih kah a tong lo tiah tualsungmi pawlin an sim.
Meithal thawn kah tongtu pawl cu USDP sungtel pakhat telin mi 4 an si thu, ralkap pawl cun kiangkap an kap ciamco ih hi thuhla thawn pehtlaih awknak nei lo tualsung mino 2 an kaih thu tualsungmi pawlih simnak vekin theih a si.
