Chin ramkulh thlanglam Matupi khawpi hrambun ralkap battallion 140 ah ralkap pawl cu November 26 zaan ah anmahlemah an kap aw ih ralbawi captain le a PSO an thi tiah theih a si.
November 26 ah Matupi peng Phanaing – Ngahlaing khua karlak ih um distric general administration office ih hmunkhuartu ralkap pawl cu CDF – Matupi thawn an kah awk hnu a zaan ahcun ralkap battallion 140 sungah ralkap le ralkap an kap aw tiah ralkap naivai mi pakhat in simnak a nei.
“Doawknak a um ni zaan ahcun ralkap sungah ralkap le ralkap karlak ah ruah dan bang aw loin an kap aw ih captain le a PSO cu an kahawknak hmunah an thi cih, mi 3 cu tur an in ruangah atu ralkap siizung ah an um” tiah a sim.
Ralkap pawl cu an umnak hmunpi ah anmahlemah kahawknak thuhla cu thuhla a suah dah lo ih Matupi khawpi hrambun ralkap battallion sungah hin mahlemah kahawknak hi kan dung khalah a rak um dah zo.
Matupi khawpi ih midang pakhat cun ralbawi captain le a PSO cu an thi timi a dik ko na’n, ralkap sungih kahawknak ruangah thi siloin zu a hartuk ih spirit an in ruangah siizung ah an thi tiah theih a si thu a sim.
“Spirit an innak ihsin an thi tiah kan thei, Matupi ah zu a har ngaingai, zu a um nawn lo lawlaw, curuangah spirit an in ih an thi cih tiah kan thei, thuhla hi an phuang duh lo khal a si thei” tiah simnak a nei.
Matupi khawpi ralkap battallion 140 ahhin August 29 khalah captain pakhat ih ralkap sung thusuak a siar laifang ah a kuthnuai ralkap pakhat cun meithal in a rak kap that zo.
