Mandalay ramțhen Mataya peng Yikyi khua uksuh Yiphyupin khua kiangah meisa thawn urkang thatmi ruak 1 le leilung ah phummi ruak 4 cu October 22 ah hmuh a si thu tualsungmi hnenin theih a si.
“Yiphyupin khua kiangah PDF sakhan a um ti tahratin kan dung baite ah ralkap pawl cu hramlak tlang lam ah an lut tiah kan thei, cui thilthlen hnuah hramlak tlang lakah ruak pawl hmuh a si tiah tualsungmi pawl cun kan hawlih kan hmu, meisa thawn urkang thatmi ruak 1 le leilung ah phummi ruak 4 kan hmu” tiah Yikyi khua ih hmin tarlang duh lo mi pakhat in simnak a nei.
Hi ruak pawl cu Yiphyupin khua kiang Naa thahnak tlang le bial vekih cahmi tlang (တောင်စောင်း) ah hmuh an siih October 16 ah Mandalay ramțhen MSTF ih sakhan fate pakhat cu ralkap pawlin an luhcilh ih an thatmi ruak pawl an si thei tiah a sim bet.
Ruak hmuhmi lakah meisa thawn urkang thatmi cu Mandalay ramțhen MSTF tatsikhmu Thakhi BB ih ruak a si thu nemhnget theih a si na’n ruak dang cu an hmin, an umnak pawl felfaiten theihfiang a si hrih lo tiah theih a si.
October 16 zaanlam suimilam 4:00 hrawngah Yiphyupin khua kiang Naa thahnak tlang ah hmunkhuartu MSTF ih sakhan fate pakhat cu ralkap 180 hrawng in dalan pawlih hruainak in an luhcilh thu Mataya GZ cun thuthannak an nei.
Cutiih an lutcilh laifang ah MSTF cu an rak kam aw rero ko na’n kiangkap khua ih mipi pawl an siatsuah pang ding tiah sakhan suahsan in an tlansuah thu, sakhan suahsan ih dung an kir laifang ah tatsikhmu pakhat a hlo ih October 22 ih hmuhmi meisa thawn urkang thatmi cu a hlotu tatsikhmu a si tiah pom a si thu Mataya GZ ih thuthannak ahcun an tarlang.
MSTF sakhan fate cu ralkap pawlih an luhcilh ruangah MSTF sungtel pawlih phone, bike pawl siatsuah sak an si hleiah sakhan ih thilri pawl an sungral thluh ih sumpai in sunralmi ting 70 lenglo a si thu, cuihleiah tualsungmi hrekkhat khal thahmi an um ih ralkap pawl cun bike le thlam pawl khal an urkang thluh thu MSTF cun simnak an nei.
