Mizan, khawthim hnu ah khan Mandalay khawpi sung hmun 15 hnakih tam ah Bomb a puak tiin vengsung mipawl cun an sim. Khawsungmi pakhat cun “Tuizan bomb puak cu a puak tam nasa, tuhi Uico ralkap le uico palik pawl hmun tin ah motorbike thawn an vak kual ciamco, mino pawl an check, tuizan nazi 7 hrawng ihsin a puak thawk ih pehzawm in a puak durdo rero. Bomb ṭhenkhat puak cu a ring nasa, Inn rori tiang hman a hnin dutdi thei, tiin Khit Thit Media hnen ah a sim.
Tucun ramsung khawpi ih Tualthat acozah hmun thupi deuhdeuh pawl cu Bomb an puak surso thlang ko ding. People’s Defense Force pawl khal hmun tin ah ready cia ṭhepṭhep an si thlang. Ramsung hmun tinkim ihsin Kawl ralkap suamhmang pawl hi do vivo an si thlang ding.
Mizan cu, Lairawn, Kalaymyo khawpi lamzin tawnkhawmnak (လမ်းဆုံ) kiangah Bomb puak le Meithal kap awn theih a si.
Zan nazi 8 zikte hrawng ah Bomb a puak ih khawlak veivak nunau pakhat a Ke ah hriamhma a tuar, tiin vengsungmi hnen ihsin theih a si.
Vengsungmi pakhat cun “Kan inn kiangte ihsin a puak ciamco, Bomb puakin a tuahmawh mi a um, nunau pakhat khawlak vak cu a Ke ah a ngah, tiin kan thei. Kawl ralkap suamhmang pawl Bomb puahnak hmun an ra thleng cih ih meithal an ra kap ciamco. Khawlak veivak mipi pawl cu Hmatpungtin an check tlun ah thudang dang khal an sut,” tiin a sim. Mizan ih Lairawn, Kalay khawpi sung meithal puak awn tampi kan rak theihmi kha, himi Bomb puak ruangah Kawl ralkap suamhmang pawl cun mipi hronak ah Van parah meithal an kap ciamco menmi a si.