Mandalay khawpi Aungmintharsan peng Min-țe-ii-kin veng uktu cu July 27 zaanlam suimilam 4:30 ah meithal thawn an kap that tiah veng sung mi pawlin an sim.
Veng uktu U Naing Lin cu a inn ih a um laifang ah khuilam minung timi theih lo pakhat cun theihpinak (testimonial) lak ka țul tiah ra thleng tahratin a ken ciami meithal thawn a kap tiah theih a si.
U Naing Lin cu a ke khatlam khatlam ah hriamhma hmunkhat veve, a pum ah hmunkhat, a tai ah hmunkhat tiin meithal hriamhma a ngah ih a hriamhma tuartu thlaphan um a si ruangah siizung ah an fehpi. Siizung a thlen hnu reilote ah a nunnak a cem.
Aungmintharsan peng Min-țe-ii-kin veng hi April thla ah ralkap in mi pakhat cu a nungcung ih an rak urnak hmun a siih, veng zung khal tuletu an rak urnak hmun a si.
July 27 thotho ah Mandalay ramțhen Chanmyatharsii peng Țan-pa-wa-ți veng zung khal bomb in an rak deng dah zo tiah theih a si.
July 14, 26 khalah Amayapura peng veng uktu nunau pakhat le Mathaya peng sungih khawbawi pakhat cu an rak kap that dah zo.
