Mandalay ramțhen မဟာအောင်မြေ peng lamzin 41 ih um ဝေယံထွန်းစျေး tiih kawhmi ကုန်စိမ်းတန်း ညဈေး ah thil leitu ralkap motor pakhat cu bomb thawn an deng ih ralkap 2 an thi, mi 3 hriamhma an ngah thu Generation Z Power (Mandalay) cun simnak an nei.
November 24 zinglam suimilam 7:00 hrawngah ၄၁လမ်း ကုန်စိမ်းတန်း ညစျေး ahcun Major pakhat ih hohanak in ralkap pawl bazaar an kai laifang bazaar hmai ih mibur umnak ah bomb an deng tiah an sim.
Bomb puak ah ralkap pakhat cu a tlu, hriamhma ngahtu midang khal an um ko ding, ralkap pawl cun bazaar ih meithal an kah ciamco ruangah hriamhma ngahtu khal an um tiah mit hmutu pakhat cun a sim.
Ralkap pawlih meithal kahnak ruangah nunau pakhat cu a hngawng ah an ngah ih midang nunau pakhat le mipa 2 khal an ke ah an ngah tiah tualsungmi pawl hnenin theih a si.
Ralkap pawl cun bazaar lamzin cu an phit ih bazaar kaitu pawl cu hringhro rero in inn an tlungter tiah tualsungmi pawlin an sim.
Hi bomb puak ruangah ralkap 2 an thi ih mi 3 hriamhma an ngah thu, ralkap motor kiangih um mi pakhat khal hriamhma a ngah thu, ralkap pawlih meithal kahnak ruangah nunau 2 an ngah ih hriamhma ngahtu tualsung minung 3 cu ngaidam an dil thu Generation Z Power (Mandalay) cun thuthannak an nei.
