Mandalay ramțhen Mahaaungmi peng tikpan lamzin parih um ကုန်လမ်းပို့ဆောင်ရေး ညွှန်ကြားမှုဦးစီးဌာန (ကညန) hmaiah October 27 zinglam suimilam 11:00 hrawngah bomb a puak ih minung 4 (nunau 4, mipa 1) cu hriamhma ngah in siizung an fehpi tiah theih a si.
Hi bomb puak ruangah bike 10 hrawng a kangih kiangkap minung pawlin bike kangmi cu an mit rero hnuah meithat motor a ra thleng ih cutin bike kangmi pawl an mitciam thei tiah theih a si.
Hi bomb puak hnuah ralkap le palik pawl an ra thlengih lamzin phit tahratin motor le bike sukso pawl an cek rero timi khal theih a si. Hi bomb puakmi cu SAF -Special Attacking Force (Upper Burma) cun kanmai kutneh a si tiah an social media cahmai ihsin thuthannak an nei.
“Ralkap council ih ukawknak khua an khanmi her thei lonak hrangah ukawknak zung, electric meter zung, siah peknak zung, kah-ngiah-nah zung tivek pawl hmuitin in kan cangvai, hi zung pawl ah siah rak pe ih ralkap council bawmtu pawl ralrin peknak ah bomb kan puaktermi a si, neta ah siah an pe thotho asile tu vekin bomb kan puakter lala ding” tiah SAF Information director cun simnak a nei.
Mandalay khawlipi ih kah-ngiah-nah zung cu Covid – 19 nathrik ruangah 2020 December 5 ihsin a langten rak khar a siih, ralkap in rampi thuneihnak an lak hnu 2021 May thla ihsin motor le bike pawl licence kum țhanter in an rak on salmi a si.
Mandalay khawlipi ih kah-ngiah-nah zung ahhin tualsung hriamkai pawlin țumthum hnakih tam bomb an rak puakter zo tiah theih a si.
