Kan dung August 8 zingih Magway khawpi Airport ih ralkap council pawl hmun thupi zet an ṭanhmun khuarnak Bomb an rak puahmi cun siatsuahmi a rak nei tam nasa. Ralkap council ih neihmi raldonak Jet Fighter vanzam pa 6 bomb in a ngah ih cumi sungih Jet Fighter pa 4 cu hman awk ṭha nawnlo in a siat thluh tiah Magwe khawpi ih um hmin tarlang duhlo mipakhat cun RFA hnen ah a sim.
August 8 sun kha Myanmar rampum huap ah 1988 rambuai lai, “88 88” tiih theih laarmi kum 33 kim hngilhlonak tuah a rak si. Zingpit khawvang hlan nazi 4 kiangkap hrawngah Ralkap council ih hmun thupi zet pakhat Magwe airport ih Ralkap ṭanhmun khuarnak le an ralthuam retnak cu tualsung hriamkai pawlin bomb an va puahmi a si.
Magway airport bomb an puah hnu August 10 sun ah khan Vanzam ralkap hotubik လေတပ်ဦးစီးချုပ် ဗိုလ်ချုပ်ကြီး မောင်မောင်ကျော် cu Magway airport a ra thleng ih Vanzam siat pawl a ra check kual tiah hmin tarlang duhlo Magway khawsungmi cun a sim. Cumi hnu August 11 ihsi cun Magway khawpi cu tui’hlan hnakih nasa in humhimnak lam an ti khoh ih tualsung mipi check le kaihkhih khal a luar sinsin tiah tualsungmi cun a sim.
Ralkap council ih neihmi Myawaddy TV cun Vanzam ralkap hotubik လေတပ်ဦးစီးချုပ် ဗိုလ်ချုပ်ကြီး မောင်မောင်ကျော် cu Magway khawpi Airport ih ṭanhmun khuar bawi upa pawl, ralkap pawl le ralkap sungkua pawl ava tawng ih tha peknak thu ava sim tiin an tarlang. Hivekin Ralkap ih neihmi raldonak Jet Fighter vanzam pa 4 rori siatsuah a simi thawn pehpar in Ralkap council ih Ministry of Information ih hotusang General Zaw Min Tun cu RFA in Phone call in thusuhnak an nei tum nan Phone a rak kai duhlo tiin an tarlang.
Magway khawpi ih airport hi Ralkap council ih neihmi Raldonak Vanzam pawl retnak hmun, hmun thupi zet pakhat a si. Kan dung April 29 zing khalah Rocket Bomb in Tualsung hriamkai pawlin an rak kap dah zo. Tuiṭum an kahnak ruangih Ralkap council Raldonak Jet Fighter pa 4 rori a siat hi cu hivek Jet Fighter an neih mal cia sapbai ah an hrang ahcun zatlaknak nasa zet a si ko ding.