Myanmar mipi thahnak ih tel ralkap daan buarnak ruangah leitlun ramkip in hremnak an pekmi ralkap council ih Ministry Of Home Affairs Deputy Minister le Myanmar Police Force Chief Officer Lt. Gen. Than Hlaing cu a țum 89-nak Interpol meeting kaiter lo dingin zatlang pawlkom 259 cun cakuat in dilnak an neih thu theih a si.
Hi dilnak cakuat cu Kim Jong Yang, Interpol Chairman, Jurgen Stock General Secretary, Interpol Committee le Interpol sungtel ram zate hnenah an pek thu theih a si.
Lt. Gen. Than Hlaing cu Myanmar rampi ai-awhtu a si lo thu, Interpol dinhmun in meeting kaiter lo dingin le zamrangten kham dingah an dil thu zatlang pawlkom pawlih dilnak cakuat ahcun an ngan tel.
Media pawlih tarlang dan vekin Interpol meeting cu Myanmar rampi ai-awhtu dingah Lt. Gen. Than Hlaing cu meeting a kai ding tiah theih a si thu, ralkap thuneihnak cun Myanmar rampi a ai-awh lo thu, ralkap council cu Myanmar acozah dingah theihpi dingin leitlun ramkip in an duh loih UN General Assembly, COP26 le ASEAN telin International Forum pawl ah ralkap council telter lo dingin kham a si thu zatlang pawlkom pawl cun an sim.
Min Aung Hlaing ih hohanak in 2021 February 1 ah rampi thuneihnak la dingih an zuamnak cu Myanmar ram daanhrampi siseh, International daan le dik zetih ukawknak policy pawl pahbal a si thu, UN Investigation hruaitu in Myanmar ram cu ralkap in thuneihnak la dingih an zuam thok ihsin mipi parah tumtahmi nei țhepțhep ih an siatsuah reromi cu minung parih tuahmi sualnak a si thu kan dung baite ah a sim thu zatlang pawlkom pawlin an sim.
Lt. Gen. Than Hlaing cu thianghlim zetih duhphorhnak tuahtu pawl țhekdarhnak policy pawl le palik pawlih țhekdarhnak an tuahmi thuhla thawn pehparin thutluknak tuahtu bik a siih, Myanmar ram ih milai covo pahbalnak pawl ah țuanvo neitu a si thu, Lt. Gen. Than Hlaing cu EU cun khualtlawnnak phihsak in a neihmi 2021 March 3 ah an phihsak thu, American, UK, Canada pawl cun Lt. Gen. Than Hlaing cu hremnak an pek vivo thu an sim.
Chin ramkulh ih doawknak hoha dingin Lt. Gen. Than Hlaing an ret thu, Sagaing le Mague ramțhen ih mipi parah doawknak nasazet an tuah thu, Rohingya miphun an rak thah rero thu, cui sual tuahnak pawl cu International Criminal Court le International Justice Court pawl a thlen thu zatlang pawlkom pawl cun an sim.
Interpol ih tumtahmi ah palik cu siatralnak ihsin leitlun kimhim ding timi hrangah komkhawm aw ding le leitlun minung humhimnak ah bawmtu ding a si thu, Myanmar minung pawl cu humhimnak an țul tuk thu, ralkap council cun ramkhel ihsin hlawknak an ngah theinak le leitlun rampi ih theihpinak hrangah Interpol meeting cu platform ah an hman leh ding thu zatlang pawlkom pawlin an sim.
Interpol cu Myanmar telim khuitawk hmun khalih a cangmi rekbet awknak pawl kham dingah țuanvo a neih thu, milai covo kilkhawi cu Interpol ih tuah theimi hnațuan hleice a si thu zatlang pawlkom pawl cun an sim.
