Karenni ramkulh Loikaw University luhnak sangka ah October 21 zaanlam nazi 2:50 hrawngah cun bomb a puak ih ralkap 2 an thi tiah theih a si.
“October 21 zaanlam nazi 2:50 hrawngah bomb a puak, bomb telmi dip cu sun hrawngah motor pakhat thawn an rak ret, cui dip cu ralkap pawlih an cekfel laifang ah a puak, ralkap 2 an thi, kiangkap cu meithal thawn an kap ciamco” tiah Loikaw hrambun Karenni thuthang cun a sim.
Hi bomb puak cu a rin zet thu tualsungmi hnenin theih a si. Bomb a puak hnuah Loikaw university kiangkap, Htay Hnga Hlia tili kiangkap, tlangbawi pawl umnak inn lamzin tluan ah ralkap pawl cu țanhmun an khuar ih lamzin sukso pawl an cek ciamco tiah theih a si.
