Hollywood Actor lar leh hlawhtling tak Leonardo DiCaprio chuan Russia in a rûn mek Ukraine ram tanpuina turin a sum thahnem tak a pek thu hriat ani.
Ukraine ram tan Leonardo DiCaprio hian $10 million a thehchhuah a, hei hi India pawisa chuan cheng vaibelchhe 76 vel zet ani bawk. Leonardo sum thawh thu hi International Visegrad Fund ten an rawn puang.
Ukraine ram tan hian Leonardo DiCaprio hi mikhual a ni hran lem lo. A pi Helene Indenbirken hi Ukraine, Odessa a piang a ni a, 1917 khan Ukraine atang hian Germany ah a nu leh pa te nen pem in, Leonardo nu Irmelin Indenbirken hi Germany ah a piang thung.
Kum 1 a nih ah Leonardo nu leh pa te hi an inthen a. A pi Helene nen hian an inkawmngeih viau a, a acting career ah pawh a phak tawk in a tawiawm fo thin. Helene hi 2008 khan kum 93 in a boral tawh ani.
Leonardo DiCaprio bakah hian milar dang eng emaw zat in Ukraine tanpui nan hian sum an pe nual tawh a. David Beckham te nupa, Mila Kunis leh Ashton Kutcher te pawh in tanpuina hi an pe. Supermodel Gigi Hadid chuan Fashion Week atanga a sum hmuh te Ukraine tanpui nan a pe vek dawn tih a puang bawk.
