Mague ramțhen Kyaukhtu peng ih cangvaitu ralkap battallion 112 pawl cu November 25 ah bomb 14 thawn do an siih, mi 10 hrawng an thi ko ding tiah Kyaukhtu PDF in thuthannak an nei.
November 25 ah Kanchawng khua ihsin Kyaukhtu lam ih fehtu ralkap pawl cu Kyaukhtu PDF cun sundir suimilam 12:00 hrawngah bomb pakhat thawn siseh, zaanlam suimilam 4:00 hrawngah bomb 8 thawn siseh, zaanțim suimilam 12:00 hrawngah bomb 5 thawn siseh an do tiah theih a si.
Doawknak cangvaih thiam lam ah hminthang an timi ralkap pawl cu Kyaukhtu PDF ih bomb hmunram sungah lamzin an hlo thluh, ralkap hmin ngan khumnak ca rori khal an sar man lo, hramrul le hramlak ah lusam mang loin an tlan darh thluh tiah Kyaukhtu PDF cun an sim.
Kyaukhtu PDF ih hmunram zingzoitu pawlih thuhla zinzoi dan vek asile ralkap ra thlengtu minung zat le bomb puaknak hmunram ihsin tlansuaktu minung zat an thlau awk dan ah ralkap 10 hrawng cu an thi ko ding tiah an tarlang.
