Mon ramkulh Kyaikhto peng Hmukpalim khua Torah tlawng kiangih Mytel cable hri an siatsuahmi cekfeltu civil uniform hru ralkap pawl cu bomb thawn an do ih ralkap 2 an thih hnu hmunram thianfai dingah a ra feh suaktu ralkap pawl cu KNLA၊ Kyaikhto Revolution Force-KRF thawn an kap aw ih ralkap 10 an thi bet tiah KRF hnen ihsin theih a si.
“Țumkhatnak bomb thawn donak ah ralkap 2 an thi ih, mi 4 hriamhma nasazet an ngah, țumhnihnak cu hmunram thianfai dingah an ra timi theih a si, cui ralkap pawl thawn minute 30 hrawng an kap aw, doawknak ah ralkap lam mi 10 an thi ih mi 6 hriamhma nasazet an ngah tiah theih a si” tiah tualsung media cun a sim.
Cuihleiah Sagaing ramțhen Monywa peng Ngiawngphyupin palik zung ih ralkap pawl cun November 26 zinglam suimilam 5:00 hrawngah hramlak hmun pakhat ih PDF sakhan pakhat cu luhcilh in an urkang laifang ah Monywa Lightning PDF cun bomb thawn an do ih ralkap 4 an thi, mi 4 hriamhma nasazet an ngah thu Monywa Lightning PDF hnenin theih a si.
“Ralkap pawlin tuizing zingpitte ah hramlak ih PDF sakhan pakhat cu an luhcilh ih an urkang laifang ah Monywa Lightning PDF cun bomb thawn an do tiah kan thei, ralkap 4 an thi, hriamhma ngahtu 4 khal an dinhmun a țha lo zet tiah kan thei, bomb hi a nasatuk si ko ding, sakhan cu an urkang thluh ih PDF pawl an kai timi thuhla cu kan thei lo” tiah tualsung hriamkai pawlin an sim.
Cuvek thotho in Mague ramțhen Kankaw peng ah November 25 zinglam ahcun Kankaw – Kalay lamzin ih ke thawn fehtu ralkap pawl cu peng țhuam 9 kiangah Kankaw PDF battallion 19 cun padithar bomb thawn an do ih ralkap 3 an thi, mi 2 hriamhma nasazet an ngah tiah Kankaw PDF cun thuthannak an nei.
Sagaing ramțhen Țanse peng thuțhennak zung kiang khalah ralkap pawl cu Țanse PDF in November 26 ah bomb thawn an do ih ralkap 3 an thi, ralkap pawl hmanmi bike 2 a siat thu tualsung hriamkai hnenin theih a si.
