Tehran tlawh a zin Kurdish hmeichhe pakhat Mahsa Amini sawisak hlum a nih na chuan khawvel pum a nghawrnghing a, hei hian Iran rampum ah buaina namen lo chawkchhuak in mipui ten an lungawilohna an lantir chhunzawm zel.
Mahsa Amini thihna lungawilohna kal zelah Iranian hmeichhia kum la naupang tak kum 20 lek Hadis Najafi chuan a nunna a chan leh tih hriat a ni. Silai hmanga kahhlum a ni tih an puang.
Hadis Najafi hi hmeichhe dang te ang bawk in Mahsa Amini thihna a lungawiloh na kawngzawh ah a tel. A lu khuhna chu a phelh a, security force ten kawtthler ah an kap.
Tarlan danin a pum, nghawng, kut leh lung zawn ah te an kap a, silai mu 6 lai hmanga kah a ni. Iranian journalist leh women’s rights advocate, Masih Alinejad chuan Hadis Najafi vuina hi Twitter ah a tarlang.
September 13 khan Kurdish hmeichhia Mahsa Amini hi a chhungte tlawhin Tehran ah a zin a, hetah hian hijab a a lu a khuh/tuam loh vangin Police in an man. Police ten an hruai atanga reilo ah nikhawhrelo a awm in damdawiin an panpui. Police ten lung lam tha lo a nih thu an sawi laiin Mahsa Amini chhungte erawh in sawisak hlum ngei a ni tih an sawi thung a, Police ten an hruai hian a hriselna dinhmun pawh a la tha tih an sawi.
Buaina chhuak ah hian lungawilohna lantira kawngzawh mi 75 aia tamin an nunna an chan tawh a, 1,200 aia tam man an ni tawh tih tarlan a ni bawk.
