/

Kum 9 lai chin hriat loha a bo hnu ah hmuchhuak in midang in fa atan an la a, chhiahhlawh ang maiin an lo chhawr

Hmeichhe naupang kum 7 a nih laia chin hriat loh a bo tawh chu kum 10 dawn a rei a khuangcher bo hnu ah zawn hmuh leh a ni a, fa atan a lo enkawl tu ten khawngaihthlak takin nun an lo hman tir a ni.

DN Nagar police atang a thudawn dan in he hmeichhe lainatawm tak hi Pooja Gaud a ni. Gilbert Hill area, Andheri ah a chhungte nen an khawsa thin a,Cama Road, Andheri a municipal school ah zirna a zawm. Mahse January 22, 2013 khan Pooja hi an School atanga an chenna in lama a haw chu in thleng lovin a bo a, a nu leh pa ten theihtawp in zawn hna thawk mahse an hmuchhuak zo lo. Police te hnen an thlen hnu ah pawh chanchin lawmawm reng hriat tur a awm thei lo.

Pooja hi ‘Girl no 166’ tia hriat a ni a, hmeichhe naupang dang bo 165 lai chu hmuhchhuah ni mahse Pooja bik hi a chanchin leh a awmna reng reng an chhuichhuak thei lo. Hetih laia assistant sub-inspector Rajendra Bhosale chu a hna atangin a chawl tawh a, a chhungte pawh in zawnhmuh leh an beisei tawh loh laiin Rajendra Bhosale erawh a beidawng ve duh lo.

Bhosale hian a hna a chawlh hnu ah pawh he hmeichhe naupang Pooja hi a theihnghilh ngai lova, a wallet a thlalak dahin a zawn ruk reng thin thu a sawi a ni.

Pooja hi nupa tuak khat Harry D’souza leh Sony te chuan an lo ru bo alo ni a, fa an neih loh vangin fa atan an enkawl a, Annie tiin hming thar an lo pe bawk. Mahse amah rubo tu te hian a hnu ah fa dang an neih leh tak si vangin Pooja dinhmun hi a chhiatzual phah a, an fa enkawl tu atan hmangin an inbul ah awmpui hna an thawh tir.

Pooja hian a hnathawhna ah hian a nu leh pa anga a en te chu a hringtu dik tak an nih loh thu a thawhpui hmeichhia hnen ah a sawi a, amah enkawl tu te chuan an tih hrehawm thin hle thu a hrilh vek. A thiannu chuan rinhlelhna lian tak neiin Google kaltlangin a zawng ta a, Pooja bo chungchang thuchhuah leh poster te chu a hmuh hnu ah a chhungte biak pawh dan ngaihtuah nghal in Pooja hi rei tak hnu ah a chhungte nen an inhmu leh thei ta a ni.

Fa atan enkawl tura ru bo a, hrehawm taka lo siam tu Harry D’souza leh a nupui Sony te chu man nghal in mihring rukbo chungchang ah leh dik lo taka inchhawrna hmang te in thubuai an siam sak.

Leave a Reply

Your email address will not be published.