Brazil ram a Espírito Santo ah chuan hmeichhe pakhat kum 39 mi Rosinalva da Silva chu a chhung ten chhuak thei lo in rei tak chhung an khung bet a, a ke chu chain hmang a thlun beh a nih bakah a kut pawh phuar sak a ni.
Ningani liam ta (February 9) ah Police ten Rosinalva da Silva hi an chhanchhuak a, a awmna hmun a an luh hian thir hmanga siam kawng khar a awm a, cell siam chawp chhung ah chuan an lo thlung bet.
A awmna hmun hi a thim mai bakah eng pawh a hmu tha thei lo a, tukverh pakhat awm atang bak khawi ah mah eng luhna a awm lo. Police ten chanchin an hriat hnu a an va chhanchhuah hian a taksa dinhmun pawh alo tha lo viau.
Ei tur hmu mumal lo a riltam tak a a awm vangin dehydrate a nei a, tualchhung damdawiin ah enkawl zui tura hruai nghal a ni. Damdawiin thlen pui a nih hnu ah a dinhmun hi a that loh em vangin damdawiin lian zawk ah transfer leh a ni bawk.
Rei tak chhung chaw mumal ei lovin a awm a, a chunga tihduhdahna avanga harsatna dang a neih leh neih loh hriat tumin medical exam dang pawh a nei bawk. Civil Police chief Carlos Braga chuan thil thleng ah hian Ms Da Silva nu hi man a nih thu a sawi a, Police te hi an in a an va kal hian a rui hle nghe nghe.
A nu bakah hian inhnamhnawih zinga tel mipa pakhat pawh a rual hian an man tel nghal. Police te sawidan chuan Ms Da Silva hian kum eng emaw ti liam ta a fa pahnih lai a chan hnu ah a rilru lamah harsatna a tawk a, a nu hian a natna enkawl dan tur vak a hriat loh vangin, atan a tha ber tur in room chhungah hian Jail tang ang maiin a khung bet ta niin an sawi.
