Chinese leh Canadian pop star Kris Wu chu pawngsual a puhna a dawn chungchang kal zelah Chinese court in thiamloh a chantir a, kum 13 Jail tang tur a hrem a ni.
Beijing Chaoyang District Court chuan Kris Wu hremna tura thutlukna an siam ah hian kum 11 leh thla 6 hi 2020 a pawngsual thubuai kha a ni a. A bak, a dang kum 1 leh thla 10 a tanna tur hi a huho a nawmchenna leh hurherhna lam rawngkai tho hawrkhawm/huaihawt thu ah a ni.
Nikum July 2021 khan influencer hmeichhia kum 18 a upa Du Meizhu chuan Kris Wu lakah hian pawngsual thubuai a thlen a, Kris hian kum 17 a nih laiin a hrai rui a, a harhfim loh lai a khawih in a pawngsual tih a sawi.
Du hian a hnu ah amah mai bakah hmeichhe dang tuar tu leh Kris Wu khawih chhiat an awm thu a sawi bawk a, a khawih zingah hian kum tling lo pawh an tel bawk a ti. Kris Wu hian puhna a dawn ah hian pha ve bawk mahse finfiahna a chiang a ni ngei ang thiamloh a chang ta tho a nih hi.
Hei bakah buaina dang hmachhawn tur ala nei tel a, State Taxation Administration of China chuan Kris hian a sum lakluh ah dawt sawiin thudik a zep a, 170 million Yuan ($23,722,143.40 USD) tax awlru ah puh a ni. Hei vang hian 600 million Yuan ($83,725,212.00 USD) a chawi a ngai dawn tih tarlan a ni.
Kris Wu hi K-pop boyband EXO member atangin hriat a rawn hlawh tan a, chinese celebrity a lar ber zinga mi niin brand lian tak tak heng Louis Vuitton, Bulgari, L’Oreal Men leh Porsche te nen pawh an thawk ho tawh. Mahse pawngsual thubuai a neih tak hnu ah Brand hrang hrang in an thawhhona an titawp a ngaih phah a ni.
